Opengelak Abanto-Zierbenara, Trapagaranera eta Santrutzira eraman du bere hiri-berroneratze eredua, hiru auzo-bulego berrirekin

• Hiru udalerriek Berpiztu programaren funtsak jasoko dituzte. Horien bidez, Lurralde Plangintza, Etxebizitza eta Garraio Sailak 17 milioi euro bideratuko ditu 2021etik 2023ra bitartean Euskadiko auzoetan hiri-berroneratzeko jarduketak indartzera.

Opengelak Ezkerraldea-Meatzaldea eskualdera eraman du bere hiri-berroneratze eredua, eta bertan hiru auzo-bulego berri jarriko ditu martxan, Abanto-Zierbena, Trapagaran eta Santurtziko udalerrietan.

Neurri hau Berpiztu programaren barruan sartzen da. Horren bidez, Lurralde Plangintza, Etxebizitza eta Garraio Sailak 17 milioi euro bideratuko ditu 2021etik 2023ra bitartean Euskadiko auzoetan hiri-berroneratze jarduerak indartzera. Hiru udal horiei eta Portugaleteri zuzeneko diru-laguntza ematea onartu zen Gobernu Kontseiluan, Iñaki Arriola Lurralde Plangintza, Etxebizitza eta Garraioetako sailburuak proposatuta.

Abanto-Zierbenan, Trapagaranen eta Santurtzin kalteberatasun handiko auzoak identifikatu dira, eta haietan, aurretiko analisien arabera, etxeko batez besteko errenta ez da urtean etxebizitzako 15.000 euro baino gehiagokoa. Hiru kasuetan, auzoko bulegoa sortuko da (opengela izenez ezagutzen dira), auzokide eta erkidegoei laguntza eta aholkularitza emateko, obrak nola egin eta finantzatu jakiteko, eta zailtasun ekonomiko gehien duten familiei jarduketak ordaindu ahal izateko finantzaketa osagarria bermatzeko funtserako sarbidea emango zaie.

Abanto-Zierbenaren kasuan, 2021aren eta 2023aren artean 6,28 milioiko zuzeneko dirulaguntza Peñucas auzora bideratuko da; 20 ataritan banatuta dauden 200 etxebizitzaren eremua (zazpi bloke). Jarduketa integrala honako honetan datza: eraikin eta etxebizitzen birgaitze energetikoa, irisgarritasunekoa, bizigarritasunekoa, segurtasunekoa eta digitalizaziokoa, eremua berrurbanizatzea eta, horretarako, auzoko irisgarritasuna, udal-euskaltegiaren birgaitze energetikoa, enplegu-planak, finantzaketa eta ikasketak kontuan hartzea.

Trapagarango kasuan, bestalde, 3,91 milioiko zuzeneko dirulaguntza San Andres auzora bideratuko da; bertan, 195 etxebizitzak parte hartuko dute hiria berroneratzeko proiektuan. Esku-hartzean honako jarduketa hauek egingo dira: eraikinak eta etxebizitzak birgaituko dira efizientzia energetikorako, eta hirigintzako zenbait jarduketa egingo dira, ingurumeneko jasangarritasunari begira, besteak beste, eraikin zaharkituen berrerabilera aztertzea eta gizarte-inklusioko ekintzak, enplegua eta I+G+b.

Santutzin, Eusko Jaurlaritzaren zuzeneko dirulaguntza Aurora Vildosolako 104 etxebizitzatan birgaitze lanak aurrera eramatera zuzenduta dago.

Hiru udal horientzako laguntza berri horien bidez, EAEn hiria berroneratzeko proiektuak dituzten udalerrien sareko auzo kopurua areagotu ahalko da. Une honetan, Bilbokoa, Durangokoa, Eibarkoa eta Lasarte-Oriakoa daude martxan; ekimen horien bidez, 42 eraikinetan banatutako 741 etxebizitzatan bizi diren 2.000 pertsona ingururen bizi-kalitatea hobetzen ari da.

Opengela eredua barruti-bulegoen inplementazioan oinarritzen da. Bulego horiek auzoak leheneratzeko prozesuak bateratzen dituzte, auzotarrei arreta eskainiz eta inplikatutako gainerako kolektiboak koordinatuz. Opengelak Otxarkoaga (Bilbo) eta Txonta (Eibar) auzoetako bi proiektu pilotu ditu abiapuntu, eta autonomia-erkidego osoan erreplikagarria izatea du helburu. Horretarako, beste lurralde batzuetara eskalagarritasuna erraztuko duten jarraibideak ezartzen ditu.